Tadau Takadop Kozo id Susuzan Tinau Kadazan




Iti no ii tadau takadop kozo. Tadau ko-6 Vuhan ko-6, Toun 1976 (6.6.1976). Naatu o kapal toniini ii sinakazon do huguan takavas om tavakas do Tinau Kadazan. Miaga do sodop dandaman.

Ogumu dati ii momuondom do aiso ii taanu do booson mahik o kinaantakan diti. Au nodii mahik o timpu di poguhu, ka. Oluo nogi do maan vagu soovo, ka do vookon hoohobi no ii puu paganakan di huguan ii nokosoomo do kopupuson miaga dii.

Otopot ii kozo do au nodii otonduhi ii kozuuzuvo di poguhu. Nga ogumu sabap nookuo do osugut monusui o kinaantakan diho nokomoi. Nung songuhun Kadazan ko, mositi nopo do kikaandak ko do mongiho do susuzan do tinau nu sondii mantad po dii poguhu.

Om iso nopo di kinaantakan tagazo id taatanga do tuhun Kadazan nga iho no kinaantakan do naatu ii kapal toniini.


Nunu Tadau Takadop Kozo diti? Pituvongon id Susuzan Kadazan!


Kinaantakan ontok Tadau ko-6 Vuhan ko-6, Toun 1976 (6.6.76) diti no ii toluo no kozo doid susuzan tinau Kadazan. Tadau diti naatu o kapal toniini ii sinakazon do tohu huguan takavas om tavakas do Kadazan. Kivaa nogi piipio huguan do tinau suvai ii nokoompit do kinaantakan diti. Tohu huguan tindama do Kadazan ii minomohuguan do parti politik kavavagu (Berjaya) natagakan do kiniopon.

Novundat o kiniopon dioho om minomutu dii hizab dioho do popomogot do ningkokoton do tuhun ngaavi doid Pogun Sabah au monutul do nunu o tinau (race / bangsa) toi kotumbazaan (creed / kepercayaan).

Noboos doid savat, om noboos nogi do vookon puu paganakan di nokogompit doid kinaantakan diti do aiso hizab dioho do momusoou kokomoi do kinaantakan diti om mogukab vagu do piungkabangan kokomoi do ahal koluluo diti. NGA apatut do maan posuato o kinaantakan diti sabaagi do somboogizan dii susuzan totopot do tinau Kadazan. AU aanu momohiiu om AU miho do ohimon o kaantakan miaga diti. AU miho do maan posusuto do hapik hisiu ii ("It cannot be swept under the carpet" ka id boos Onggilis).

Mositi do sumuang o tikid tikid Kadazan, mohoing, komuhakan om tangaanak doid kinaantakan diti.

Nookuo?

Mooi do kopiuman zioho do nunu kohizaban do huguan dioho di poguhu, kozibahan ii poingapui. Iti no ii kohizaban ii minogovit dioho do kumininam do humabus mantad do ningkokoton ii aiso do tiinu, kohizaban ii minanaak dioho do vinakas do humavan nunu ii kalaatan ii dumonto doid tuhun dioho, ii tomoimo do mongunsub dioho do aiso timpu do mundoong, do momuondom kavasian do tinau sondii naamot do momohiiu nunu toluo ii opiumanan doid tinan om pomusaavan.

Dodizo no o kinaantakan ontok tadau takadop kozo diti om nunu ii nimaan do tohu huguan Kadazan diti. Dodizo no zioho do ponoko-tiuvan (example). Toimoo om dodizo no o pinaagat, katabazan, siniou dioho om kotumbazaan doid tinau sondii sabaagi do tukuan (standard) do pomumusoou, koimaan om kopooposizon.

Iisai o tohu huguan diti?
Siou kumaa doid puu do paganakan do huguan ngaavi diti do a-ait do doiti o ngaan ngaavi diti. Nga miaga dihia noboos id savat AU aanu do modihiu do moboos kokomoi do kinaantakan tadau takadop kozo diti.

Miho do toimoon do martir (martyr) o tootohu huguan Kadazan diti. Martir izioho montok no do kobuu-on om komogoton do tuhun Kadazan doid pogun dioho sondii.

Itia no ngaan dioho:

  1. Tun Fuad Stephens (poguhu hoovon do Dato Donald Stephens) ii Polosiden do Parti Berjaya om Huguan Montili do Sabah toun 1976 (Huguan Montili koiso do Pogun Sabah di toun 1963)
  2. Datuk Peter Joinod Mojuntin, Momoopitagazo do Kousinan do Berjaya om Montili id Polinta do Berjaya
  3. Datuk Darius Binion, Montili

Nokoundun kiniopon dioho ontok kaantu ii kapal Nomad ontok Tadau ko-6 Vuhan ko-6, Toun 1976 (6.6.76). Kivaa po piipio tuhun ii navahun. Ogumu ii momungaan do kinaantakan diho do "Double Six Tragedy" ka doid boos Onggilis, mantad no do naantakan iho ontok ko-6 Vuhan ko-6. Nga miho nogi iho do booson do "Triple Six Tragedy" tu tohu o numbul ko-6.Tohu No. 6 nopo nga tanda do kalaatan (Id Buuk Tobitua Bible).

Iti no tadau takadop kozo do tuhun Kadazan.

Gisom baino aiso nokoiho do nunu kozo sabap do naatu ii kapal. Kivaa do kontrovosi kokomoi diti gisom tadau diti ii au po noidu. Mohoing Savat no koiho diti om kivaa kuasa do popointahang nunu kozo ii naantakan.

Naamot diho, nunu dii apatut do maan nu? Nunu ii maan daa do tuhun Kadazan? Tumihombus naku do tumood id ko-iadan toi' mogohim do naantakan ngaavi ii toi' ko hiivan ii tu' oluo do ondomon?

Apatut nangku to minsud o tinau Kadazan om muzu pakaazan doid hobi komogoton id koposizon dioho? Apatut nangku do popoiho do sukod vagu kokomoi do kohizaban do huguan Kadazan diti om do humizab do mimang di tavasi no kozo montok dioho sondii, montok do tinau dioho om montok pogun dioho?

Nung ingkaa, iisai di indadon do popoiho dioho?


Mooi DUTIA do mambasa nunu komi do songuhun huguan Kadazandusun kokomoi kinaantakan diti. Click HERE for a comment on this incident by a Kadazandusun leader.







Tadau Takadop Kozo: The darkest day (which is about the disastrous impact of the demise of three prominent Kadazan leaders in the incident known as the Triple Six plane tragedy.)

Disclaimer
Privacy Policy

To Home Page