Pobpiumanan Ko


Pobpiumanan ko - nung mangakun ko do songuhun ko mantad do tuhun Kadazan - do kuminam popomogot, popobuu om popoingkavas ningkokoton do tuhun Kadazan.

Nung magampa ko do songuhun mantad di huguan ngaavi do Kadazan, mobpiumon o tuhun Kadazan do au ko mimang toi moboos do nunu ii kaanu popomungkang do ningkokoton do tinau Kadazan. Id sampaping dii, mobpiumon tuhun Kadazan do kaanu ko papavakas dioho.

Nung songuhun ko mantad di huguan di nopihi toi noundi, pobpiumanan ko do mimang nunu ii kaanu popoinsavat ningkokoton do tuhun Kadazan tumanud do undang-undang, polisi om piniangazan ngaavi. Au ko pobpiumanan do mimang nunu ii kadaandang do kootulan, nunu ii aiso po kasagaan toi aiso po polisi toi piniangazan. Nga mobpiumon ma diau o tuhun Kadazan do popotimpuun toi maganu haang ii kaanu popoohon kootulan, polisi toi piniangazan mooi do komogot o tiinu do tuhun mamasok diti.

"Oo, ouhan do moboos do ingkaa," ka dati do vookon. "Indama, opulokis do moboos do poindikau om maataling o takod." "Osusa do momodimpot dino," ka dati di suvai.

Oo, kivaa nogi katapatan. Nga nung kivaa ohodong do kabasa diti nga avasi no ino. Kivaa do topiumanan tuhun dii.

Koiho ko do nunu no ii naanu nu do mimang. Nga ino nopo nga baabaino. Kaanu ko do mimang di hobi po dati vinasi toi hobi mogot mantad dino. Ahansan do ingkaa no. Kaanu ko dati momusoou di hobi po vinasi, hobi po do tinaom om ii kaanu poposindab do tapui id tanga do tuhun mamasok ii modtikopisok no.

Nung kivaa diau do ningkokoton, pinataak ii do Mohoing Savat. Kivaa ningkokoton, kivaa tonggungan. Hobi kinavas ningkokoton, hobi ginazo
tonggungan. Hobi ginazo kuasa di ningkokoton, hobi ginazo pobpiumanan do tuhun.

Nga otopot motuu do sabap no do minimpaagat ko do dumimpot do ningkokoton nu do baino do mositi nopo dati do kivaa tudduvon di tavasi om takavas.

Na! Kapanaak koposizon di avaavasi po o ningkokoton takavas. Otopot iti nga otopot nogi do songian nopo kivaa ningkokoton takavas, ogumu om agazo nogi o ponginaman om nunu ii kaantob. Om ii podii do sabap no do pobpiumanan do tuhun do aiso kaanu modihiu mantad tonggungan do umampai doid tootoinaon ngaavi ii kaanu popobuu do tuhun sondii.

Kivaa do kaantakan ngaavi do au kaanu tuhun Kadazan mimang nunu ii hobi avasi toi kotunud. Kivaa dati do sabap nokuo tu ingkaa. Ii podii
koosizan do ontok nopo do au nodii poingigit do ningkokoton ii kikuasa,  togizon nodii zioho do tuhun.

Kivaa nodii ii moboos do, "Aiso notuutuhung diaha," ka. "Miaga ii di ziaha dotokou do baino." Kivaa dati do katapatan dii nga mositi nogi kivaa noimaan do tuhun dii ii avasi.

Kivaa nogi ii manaasangi. Au songkuo avasi iti. Kivaa nogi ii mana-u. Ta! Kada podaa do koikot miaga diti. Au toomod kotunud, koni?

Vookon Ningkokoton ii Nomboo do Pobpiumanan Ko do Tuhun

Pobpiumanan ko do tuhun nu do mimang nunu ii tavasi om kotunud nung songuhun ko mantad ditia id siibo.

1. Huguan Siou om huguan ngaavi do KDCA
2. Montili Kadazan
3. Upisol Kadazan id kopolintaan
4. DC, NC, Huguan Kampung (KK) Kadazan
5. Kadazan id JKKK
6. Huguan id kotumbazaan
7. Kotinanan Kadazan di suvai

Pobpiumanan Ko Dumampot Kumaa Takavas no Kozo
Iti no iso mantad di pobpiumanan ngaavi do au kaanu huguan Kadazan do modihiu toi mogidu. Nung aanu momodimpot, avasi. Nung au aanu do
baabaino, kinaman vagu gisom odimpot toi ahantoi.

Nga pomogunan do baino hobi oukot. Ountingau pomusaavan do tuhun ngaavi. Ogumu katangkangaan! Obulalau o komuhakan ngaavi tu ogumu
ii kalaai om kagazat do ginavo. Gumazo o tanak ngaavi do ogumu koimbaazat ii au avasi. Ogumu ii kalavong.

Iti no aantakan id vinoun. Au ii tumood do mimang ohon kozuuzuvo doid vinoun toi id kakampungan potuu. Nung au opulokis do momusoou, oduanan kozo. Ingkuo dii do mimang pahud toi humobi do kaantakan ngaavi diti? Ingkuo dii dumimpot di akaakavas po toi moomogot po mantad ngaavi do kaantakan ngaavi diti?

Nga okonko saviavi ii aantakan diti do avasi om kopogovit do kavasian toi kounalan kumaa tuhun Kadazan. Ingkuo nodii magaha do kalaatan ngaavi ii mikot do monimbaagat do tuhun, au momihi do iisai zioho, au momihi nunu ningkokoton dioho.

Mantad diti do pobpiumanan ko, hoohobi no sabaagi do songuhun huguan, do monokodung manahob toi mongipop nunu ii au avasi kumaa doid tuhun nu.

Kuminam nodaa o tuhun Kadazan do mimang pahud nunu ii avasi om kaanu popomogot do ningkokoton dioho om modihiu mantad kalaatan toi humavan nunu ii kopogovit do koutuman om kalaatan.

Pinsingkinam no mimang nunu ii tavasi kozo montok Kadazan. Nunu ii otopot, kotunud om otuhid nga mositi nopo do avasi. Pinsintogu no popobuu ningkokoton nu mooi do kobuu ningkokoton do tuhun nu, Kadazan.

Pobpiumanan ko do mimang diti montok diau sondii, paganakan nu, tuhun nu om pogun nu.


"On-going study that examines the role of ethnic identity,cultural unity and indigenous leadership institutions in shapingpolitical changeamongthe Kadazandusuns..."






Disclaimer
Privacy Policy

To Home Page